Zulayho Boyhonova - Olcha guli

Shamol silkib olcha gulin,
Ayamay to‘kib ketdi.
Sevaverdim, sevging yurak
Choklarin so‘kib ketdi.
Olcha gulim a’lo bilib
Xazonni titib ketdi.
Hislarimni dorga ilib
Yuragim sitib ketdi.

Sharqiragan soyning suvi
O‘padi qirg‘oq poyin,
Yuragimdek taxtni tashlab,
Poyigami* borgan joying?
Oymomoni ayamsiz deb,
Yulduzdan hol so‘raymi,
Sen o‘zgaga qarab ketsang,
Peshanamdan ko‘raymi?

Majnuntolning suvga yetmay
Sabri sindi zorlanib,
Sevar edim jondan ortiq,
Aytolmadim orlanib.
Ketgan bahor qayta-qayta
Kelaverar uyalmay,
Ko‘ngil berib qo‘yganimni
Armondaman suyolmay.